भक्तपुर १ मा नेमकिपाका सुवाल अन्य सबै १३ दलका उम्मेदवारले पाएको भन्दा पनि धेरै मतले विजयी
भक्तपुर । नेपाल मजदुर किसान पार्टी (नेमकिपा)का प्रेम सुवालले ४२ हजारभन्दा बढी मत ल्याएर विजयी भएका छन् ।
सुवाल भक्तपुर क्षेत्र नम्बर १ बाट पुनः विजयी भएका हुन् । भक्तपुर क्षेत्र नम्कर १ मा नेमकिपा २०४८ देखि निरनर जित्दै आएकाेमा २०७९ काे प्रतिनिधि सभा सदस्य निर्वाचनमा पनि निर्वाचन जित्न सफल भएकाे छ।
नेमकिपाको गढ मानिने उक्त क्षेत्रमा सुवालले आफ्नाे प्रतिस्पर्धी सबै १३ दलका उम्मेदवार तथा स्वतन्त्र उम्मेदवारहरूले पाएको भन्दा पनि धेरै मत पाएर विजय हासिल गरेका हुन् । सुवालले ४२ हजार ७ सय ६१ मत पाएर विजयी हासिल गर्दा सबै १३ उम्मेदवारले जम्मा २८ हजार ९ सय ४७ मत मात्रै प्राप्त गरेका छन् ।
उनका निकटतम प्रतिद्वन्द्वी नेकपा एमालेका नवराज गेलालले ११ हजार ९ सय ६८ मत प्राप्त गरेका छन् भने राप्रपाका भरतबहादुर खड्काले ९ हजार ३ सय मत प्राप्त गरेका छन् ।
यस्तै, सत्ता गठबन्धनका साझा उम्मेदवार नेकपा माओवादी केन्द्रका सुनिल गोठेले ५ हजार २ सय ८३ मत प्रनप्त गरेका छन् ।