नेपालको विजयी शुरूवात, सिङ्गापुर ८ विकेटले पराजित
काठमाण्डौं । टी-ट्वाण्टी विश्वकप क्रीकेटको छनौट खेलमा नेपालले विजयी शुरूवात गरेको छ ।
आज टियु क्रीकेट मैदानमा भएको उद्घाटन खेलमा सिङ्गापुरलाई ८ विकेटले पराजित गरेको हो ।
टस जितेर पहिले ब्याटिङ्ग गरेको सिङ्गापुरले निर्धारित ओभरमा ९ विकेटको क्षतिमा १४५ रन बनाएको थियो । सिङ्गापुरको लागि रोहन रङ्गराजनले ४६, आर्यावीर चौधरीले ३७ र मनप्रीत सिंहले २४ रन बनाएका थिए । नेपालको लागि अभिनास बोहराले ३ तथा गुल्सन झा, करण के.सी. र सन्दीप लामिछानेले समान २-२ विकेट लिएका थिए ।
जवाफी ब्याटिङ्गमा नेपालले १६ ओभर ३ बलमा विजयल्क्ष्य हासिल गरेको हो । नेपालको लागि कुशल भुर्तेलले ४८ बलमा ७४ रन बनाएका थिए भने कप्तान रोहित पौडेलले अविजित ३५ र आशिफ सेखले २७ रन बनाए । सिङ्गापुरको लागि अनन्त कृष्ण र अक्षय पुरीले १-१ विकेट लिए ।
जितसँगै नेपाल समुह ‘ए’ को शीर्षस्थानमा पुगेको छ । अर्को समुह अन्तर्गत मुलपानी हाल बहराइन र युएई भिड्दैछ ।
भोलि कार्तिक १४ गते दिउँसो १:३० बजे नेपालले दोस्रो खेलमा मलेशियाको सामना गर्नेछ ।