काभ्रेमा मदानीविटको शुभारम्भ
काभ्रे । हरेक सुचनाकाे मन्थन, पारदर्शिता र निष्पक्षताकाे प्रवर्द्धन भन्ने नाराका साथ मदानी विट मिडिया प्रालिद्वारा मदानीविट डटकम अनलाइन न्युज पोर्टलकाे शुभारम्भ भएकाे छ ।
काभ्रे जिल्लामा लामो समयदेखि पत्रकारिता क्षेत्रमा क्रियाशील एवं पत्रकार महासंघ काभ्रे शाखाका निवर्तमान अध्यक्ष मोतिराम तिमल्सिनाको अध्यक्षतामा सञ्चालित मदानीविट डटकम सोमबार शुभारम्भ भएकाे हाे ।
पूर्व संचार तथा सूचना प्रविधि मन्त्री एवं काभ्रे क्षेत्र नम्बर २ का प्रतिनिधि सभा सदस्य गोकुल प्रसाद बास्कोटाको प्रमुख आतिथ्यतामा भएकाे शुभारम्भ कार्यक्रममा बाेल्दै विट मिडिया प्रालिका अध्यक्ष तिमल्सिनाले सञ्चार माध्यमको भिडमा एक थप्ने उद्देश्यले नभई आम पाठक समक्ष नमुना ढंगबाट सूचना प्रदान गर्ने उद्देश्यले साे मदानी डट कमको सुरुवात गरेको बताए।
शुभारम्भ कार्यक्रममा बाेल्दै प्रमुख आतिथि बास्कोटाले आजको अवस्थामा प्रिन्ट मिडिया कमजोर भएर न्यू मिडिया आएको छ, न्यू मिडियाले गर्दा घण्टा घण्टामा नभई छिन छिनमा सूचना प्राप्त हुन्छ भन्दै मिडिया सञ्चालन हुनु ठुलो नभई समाजमा पार्ने प्रभाव ठुलो भएकाे बताएका छन् । आजको आवश्यकता भनेको सम्बन्ध भएका मान्छेहरूलाई मात्रै हैन सम्बन्ध हीन मान्छेहरूलाई समाजमा जोड्दै लानु पर्ने भन्दै उनले नकारात्मक मात्रै हैन समाजको सफल पक्षलाई पनि आम नागरिकको वीचमा पुर्याउन आवश्यक रहेकाे बताएका छन् ।
बाँस्कोटाले मिडिया सञ्चालकलाई सुझाव दिदैं राज्यको जबाफदेहीता हुन्छ नागरिक प्रती, प्रेसको पनि जबाफदेहीता हुन्छ नागरिक प्रति यस कारण प्रेसको तागतलाई निहित स्वार्थको निम्ति दुरुपयोग गर्ने हैन देश, जनता, सामाजिक एकता, राष्ट्रिय एकताका साथै आम मान्छेको चाहनाहरूलाई राज्य समक्ष पुर्याउनु पर्ने बताए।