जापान समुह विजेता, स्पेन हारेर पनि नकआउटमा, जर्मनी विश्वकपबाट बाहिर

कतार । फिफा विश्वकप २०२२ को समुह ‘ई’ अन्तर्गत आज भएको खेलमा जापानले स्पेनलाई २-१ ले पराजित गर्दै समुह विजेताको रूपमा नकआउट प्रवेश गरेको छ ।

यता कोस्टारिकासँग ४-२ को जित निकालेको जर्मनी भने दोस्रो पटक लगातार विश्वकपमा समुह चरणबाटै बाहिरिएको छ ।

समुह ‘ई’ मा जापानको ६ अंकको साथ समुह विजेता बनेको हो भने स्पेन र जर्मनीको समान ४-४ अंक रहेको छ । कोस्टारिकालाई पहिलो खेलमा ७-० ले पराजित गर्नाले स्पेन गोलअन्तरको आधारमा नकआउट प्रवेश गरेको हो ।

जापानले अब नकआउटमा क्रोएसियाको सामना गर्नेछ भने स्पेनले मोरोक्कोको सामना गर्नेछ ।