कतार विश्वकपको पहिलो टाईब्रेकरमा जापानलाई हराउँदै क्रोएसिया अन्तिम आठमा प्रवेश
कतार । फिफा विश्वकप अन्तर्गतको अन्तिम १६ को आज भएको जापान र क्रोएसिया बीचको खेल टाइब्रेकरमा पुगी क्रोएसियाले जापानलाई ३-१ ले पराजित गरेको छ ।
खेलको ४३औं मिनेटमा डाइजेन मेइदाको गोलबाट अग्रता लिएको जापानलाई ५५औं मिनेटमा क्रोएसियाका इभान पेरिसिकले गोल गर्दै बराबरीमा रोकेका थिए ।
निर्धारित समयमा १-१ को बराबरी भएपछि खेलमा ३० मिनेट अतिरिक्त समय थपिएको थियो, जसमा समेत कुनै पक्षबाट गोल नभएपछि खेल टाईब्रेकरमा पुगेको हो ।
पेनाल्टी सुटआउटमा क्रोएसियाका डोमिनिक लिभाकोभिकले जापानको ३ खेलाडीको पेनाल्टी रोकेका थिए । क्रोएसियाको तर्फबाट ४ खेलाडी मध्ये ३ जनाले गोल गरेका थिए भने जापानको तर्फबाट मात्र १ खेलाडीले गोल गर्न सकेका थिए ।
क्रोएसियाले अर्को चरणमा आज राति ००:४५ बजे हुने ब्राजिल र दक्षिण कोरियाबीचको खेलको विजेतासँग भिड्नेछ ।