ऐरीको आक्रामक ब्याटिङ्गमा नेपालद्वारा युएई ५ विकेटले पराजित
मुलपानी । काठमाडौंको मुलपानीमा जारी त्रिकोणात्मक टीट्वान्टी क्रिकेट अन्तर्गत आज भएको खेलमा दीपेन्द्र सिं ऐरीको आक्रामक ब्याटिङ्गमा नेपालले युएईलाई ५ विकेटले पराजित गरेको छ । नेपाललाई जित दिलाउन दीपेन्द्र सिंह ऐरीले १५ बलमा ६ चौका र १ छक्का सहित अविजित ४० रन बनाएका थिए ।
टस हारेर पहिले ब्याटिङ्ग आमन्त्रण पाएको युएईले निर्धारित २० ओभरमा ७ विकेटको क्षतिमा १६४ रन बनाएको थियो । युएईका लागि भृत्य अरबिन्द र बसिल हमिदले ४५–४५ रन बनाएका थिए भने असिफ खानले १८ रन बनाएका थिए । नेपालका लागि सोमपाल कामी र अभिनास बोहराले समान २–२ विकेट लिएका थिए । कुशल मल्लले ४ ओभर बलिङ्ग गर्दा विना कुनै विकेट मात्र १० रन दिएका थिए ।
जवाफी ब्याटिङ्गमा उत्रिएका नेपालले १९ ओभर २ बलमा विजयलक्ष्य हासिल गरेका छन् । नेपालका लागि आसिफ सेखले ५० बलमा ६२ रन र कप्तान रोहित पौडेलले ४२ बलमा ४७ रन बनाएका थिए । युएईका लागि मुहम्मद जवादुल्लाहले २ विकेट लिएका थिए ।
कार्तिक ८ गते युएईले हङ्गकङ्गको सामना गर्नेछ । उक्त खेलमा युएई जितेमा कार्तिक १० गते हुने फाइनल खेलमा नेपालले पुनः युएईको सामना गर्नेछ ।
फाइनल खेल त्रिभुवन विश्वविद्यालय अन्तर्राष्ट्रिय क्रिकेट मैदानमा हुनेछ ।