दयाहाङ र प्रकृतिको ‘बिहे पास’ युट्युवमा सार्वजनिक
काठमाडौं । दयाहाङ राई र प्रकृतिको श्रेष्ठको अन्तरजातीय विवाहसँग सम्बन्धित नेपाली चलचित्र ‘बिहे पास’ आज युट्युबमा सार्वजनिक भएको छ ।
प्रवेश पौडेलद्वारा निर्देशित तथा रोजन श्रेष्ठद्वारा निर्मित चलचित्र ‘बिहे पास’ मा राई र श्रेष्ठसँगै शिशिर वाङ्देल, बुद्धि तामाङ, रविन्द्र झा, श्याम राई, बिशाल पहरी लगायतको अभिनय हेर्न सकिन्छ । चलचित्र युट्युबमा बुढासुब्बा डिजिटल च्यानलबाट सार्वजनिक गरिएको हो ।
श्रीमती तथा ससुरालाई फकाउन सरकारी जागिर खानैपर्ने बाध्यताबीच युवाले गर्ने सङ्घर्ष र प्रयत्नको विषयलाई निकै मिठासका साथ प्रस्तुत गरिएको चलचित्र हो, ‘बिहे पास’ । चलचित्रले आमनेपाली युवाको पीडा बोलेको छ ।
चलचित्रमा अभिनेता दयाहाङ राई सरकारी जागिर खान प्रयत्न गर्ने पतिको भूमिकामा देखिएका छन् भने उनकी श्रीमती अभिनेत्री प्रकृति श्रेष्ठ छिन् । चलचित्रले सरकारी जागिरको कुरा मात्र होइन, नेपाली जनजीवनका विविध आयामलाई पनि रोचकताका साथ प्रस्तुत गरेको छ ।
त्यस्तै चलचित्रमा दयाहाङ र प्रकृतिबीचको प्रेम र बिहेको प्रसङ्गलाई देखाइएको छ; जहाँ प्रकृति सरकारी अधिकृत हुन् भने दयाहाङले सरकारी जागिर खान मरिहत्ते गर्छन् । दयाहाङले प्रकृतिलाई बिहेका लागि राजी गर्न गरेको जालझेल र बिहेपछि वास्तविकता थाहा पाउँदा उनीहरूको सम्बन्धमा आएको उतारचढाव नै चलचित्रको मुख्य कथा हो ।
चलचित्र हेर्नका लागि यहाँ क्लिक गर्नुहोस् ।